Freischütz Pörnbach e.V.
Tradition seit 1904

Weiberfasching 

De Voglwuidn Schütznweiber hom wieder zu eanan Weiberfasching eiglodn und ganz vui hom se net lumpn lassn und san kemma. Von überoi her, des kon ma se gar net vorstein. Dass den Weiberfasching gibt, da dro san eigentlich de Manner von de Voglwuidn Schütznweiber schuid. Da san nämlich a poor dabei, de wuin um`s farecka an Fasching net zum Tanzn geh. Weil mia natürli sozial eigsteit san, hom ma gsagt, dene Weiba muaß geholfen wern, damit de a aus eanane vier Wändt rauskemma in da Faschingszeit. Kurzerhand hom ma uns im Johr 2005 am Unsinnigen Donnerstag, natürlich mit da Genehmigung von unserm Herbergswirt, im Nebnzimmer troffa. Voglwuid maskiert und a genau a so drauf. De Musi mit dem Kassettenrekorder war ja net grad da Oberhit, aber es is scho ganga. A Johr drauf hom ma dann an DIDI organisiert. Des war a "Einhand-Band". De wos do warn, de wissn scho wia i des moan. Da is de Gschicht mit da Danzerei scho besser ganga und d`Stimmung war famos. Im drittn Johr war dann oiwei no da DIDI do, aber dann san mia scho anspruchsvoller worn. Da hot jetz a richtige Musi her gmiasst und ausserdem hom mia uns im Nebnzimmer fast dadruckt, so vui warn ma inzwischen. A bisserl zweifelt hob i ja scho, aber der Rest von uns hot unbedingt an Saal nauf woin. Oiso, hom ma as Duo Andre organisiert und a bisserl a Werbung gmacht. Mei, hom mia gschaut, wia im ersten Johr scho an Hauffa Weiba kemma san. Ja und was draus worn is, des kinnt`s Ihr an de Buidl untn seng. Auf alle Fälle is a Fetz`n Gaudi - und natürli spuin mia a jed`s Johr a Theater oder machan hoit irgend an Schmarrn, damit`s unsere Gäste a gfoit bei uns. 

2019 hom ma des 15. moi den Weiberboi veranstaltet. Mia hom jedes Jahr sovui Besucher ghabt, dass ma nia enttäuscht warn. .....bei jeder Wetterlage. Aber in de letztn drei Johr hom ma gmerkt, dass se so schleichend  die "Selbstverständlichkeit" broad gmacht hod. Viele san kemma und wuidtn einfach seng was so los war, hom se higsetzt und hom se von uns dann lacha lassn. Und sowas kost unheimlich Kraft und es macht uns a koa Freid, wenn de Stimmung Urlaub macht. Mia san ja nimma de Jüngstn und bevor mia uns richtig fertig feiern, hom ma beschlossen kurz und bündig aufzuhören. Es war a herrlich, schöne Zeit. Mia bedanken uns bei allen treuen und untreuen Besucherinnen......einfach bei jedener die irgendwann in de 15 Johr amoi bei uns do war. 
Sicherlich findts Ihr wieder an Weiberboi wo was los is. Mia wünschens Eich von Herzen.

<<<<<<<<<<<<<<<<<<<<<<<<<<<<<<<<<<<<<<<<

....einfach auf des erste Buidl draufklicken und dann gehts mitm Pfeil nach rechts, oiwei weidda....

 

Vui Spass beim Erinnern

 

dazwischen war a Garde do .....und 2019 warn de Plattlerbixn bei uns.

Pfiad Eich

 



 
Info